وصلت الموقف ..

اول مفاجأة انو في أي شنطه عايزين رسوم .. لكن عالجت الموضوع بعد عزاب وكلام كتير وعشان ما تقعوا في المشكلة دي .. انت قبل م تقطع تذكرتك لازم تعرف كل التفاصيل .. الشنط الزيادة بكم .. يعني تتفق قبل م تحجز.

المهم حدث كما توقعت فوضى عارمة قبل ركوب البص .. الناس كتيرة والعفش اكتر من الناس الساعه 6 جات موعد التحرك لكن وقتها كنا في قلب الفوضى.

العفش لسه كتير والناس اكتر من عدد المقاعد المهم بعد جهد جهيد تم رفع العفش في البص وركوب المسافرين في انتظار التحرك فجأة البص تحول وكأنه مقهى أو كافيه .. ناس تنزل وناس تطلع وناس قطعت ولقت مكانهم فيهو ناس وهكذا ساعه كاملة حتى تم الاضطرار لاستدعاء بص اخر لحل المشكلة.

بعد م اتحلت مشكلة فوضى الركاب ظهرت مشكلة البص .. يدور ويقيف يدور ويقيف قريب ال 7 مرات المرة التامنه البص قام … تعطل مرة أخرى لمدة نصف ساعه في أطراف القاهرة اتحلت المشكلة واتوكلنا.

البص المصري تعطل مرة أخرى في منتصف الرحلة لمدة 10 ساعات . البص فيهو اطفال رضع ونساء وكبار سن وشيوخ .. و المكتب يتحمل ذنب هؤلاء المساكين.

في مبيت في داخل مصر في محطه اسمها توشكي .. لقينا كمية من السودانيين بصات وعربات صغيرة وشرايح كلها راجعه السودان.

طبعا ما بتخشوا المعبر المصري .. البصات بتشيلا ب فوق ..

دخلنا المعبر السوداني .. الإجراء الوحيد هو إبراز الهوية.

لا رسوم لا تفتيش ولا اي شي .. عفشك كلو مافي زول بسالك بقول ليك شايل شنو .. الضباط السودانيين بتسمع منهم كلمه واحدة فقط وهي ( جوازك أو رقمك الوطني ).

يعني بس بتنزل عفشك من البص المصري والى البص السوداني مباشرة وبسبب كثافة المسافرين .. البصات الراجعه السودان بتقيف خارج مباني المعبر السوداني.

انا بصراحه اتفاجات جدا بالعدد الضخم للعاءدين بالرغم من غلاء التذاكر من المعبر السوداني البصات بتتحرك في طوف ( الطوف من 7 بصات ) تجنبا للحوادث.

قومه وااااااااااحدة حدك دنقلا .. البص بقيف هناك استراحه ومبيت .. دنقلا باااااردة شديد ما بتقدر تنوم الا ببطانية وفي مطعم تاكل تشرب تظبط امورك وتنوم.

من دنقلا التحرك الساعه 4 … بعد مسافه في وقوف في مطعم استراحه … وبعدها البص تاني ما بقيف إلا في امدرمان قندهار …

ناس امدرمان بنزلوا قندهار وناس الخرطوم البص بتحرك تاني بوديكم المينا البري ومن هناك تشوف اي عربية توصلك محل ماشي.

ملاحظات // شيل معاك اكل خفيف عشان اكل الطريق سواء المصري أو السوداني ( غالي ) شيل معاك بطانية لانو في مبيت في دنقلا ودنقلا باردة جدا ليلا جيب معاك اي حاجه متعود عليها في مصر لانو مافي تفتيش حسب توجيهات الدولة

المهم تعال السودان وانته ما محتاج تاني تشتري.

خت في بالك انك راجع تبني بلدك .. ما تعمل فيها زعلان ومتفاجيء .. والحمدلله انك قدرت ترجع الخرطوم بعد ما جات لحظه الجميع فقد الامل انو يرجع اصلا.

انا الان رجعت لي 5 يوم .. ما شفت كهربا بتقطع 16 ساعه ..

كان قطعت ساعتين تلاته .. البعوض ما زي بحكو الناس في الفيس .. الكلاكلة دي ما فيها بعوض مزعج انا الناس بتنوم في الحوش عاااادي جدا .. وحاليا أثناء كتابة البوست في الحاج يوسف مافي بعوض بالطريقه المخيفه ديك .. والذباب قدر عدد أصابع اليد بسييييط جدا… ارجعوا … الخرطوم حقتكم انتو .. ومجبورين عليها .. العاصمة تحتاج لكم هذا اخر قولي).